Al-Andalus elkarteak, iazko arrakasta ikusita, Arrasateko II. Flamenko Jaialdia antolatzea erabaki du. Finalerdiak azaroaren 29an, urtarrilaren 10ean eta urtarrilaren 17an egingo dituzte, Al-Andalus elkartean. Finala, ostera, urtarrilaren 31n egingo dute, Amaia Udal Antzokian.
Aurten sari gehiago emango dituzte: lehenengoari dirua eta urrezko eta zilarrezko garaikurra emango dizkiote. Garaikurrean Arrasateko Portaloia irudikatu dute, herriko armarriarekin, eta haren azpian jarleku bat eta gitarra espainola. Guzti horrek Arrasateren eta flamenkoaren arteko harremana sinbolizatzen du. Horrez gain, sari gehiago daude, baina beste bi nabarmenduko genituzke: batetik, Euskal Herriko flamenko-kantari onenari emango diotena; eta bestetik, Joan eta Etorriko Cante onena egingo duenari. Finalerdiak ikusteko ez da ezer ordaindu behar.