Gaztetxoen jolasekin hasi zuten eguna. Gustura aritu ziren horiek Herriko Plazan lokotxak batzen, zaku lasterketan, arrautzak eramaten eta beste hainbat kontutan. Auzoko egitasmoan diharduten marokoarrek eta aljeriarrek ere bat egin zuten jaiarekin eta hainbat jaki gertatu zituzten herritarrek dasta zitzaten.
Okila taila taldekoek, ostera, euren lantxoak erakutsi zituzten eta Hiruatx elkarteak bidezko merkataritzako produktuen postua jarri zuen urtero lez.
Eguerdi partean herriko trikitilariek doinu alaiekin bete zituzten kale-bazterrak eta ondoren bazkaltzera jo zuten guztiek; Iturrigorri pilotalekuan elkartu ziren eguzkitik babestu nahian. Eguraldiak okerrera egin bazuen ere ez gero giroak eta ekitaldi guztiekin jarraitu zuten aurrera, bolo txapelketarekin eta Larrain dantzarekin, besteak beste.