Gaztetxoen jolasekin hasi dute eguna eta Auzoko egitasmoan diharduten marokoarrek eta algeriarrek hainbat jaki gertatu dituzte herritarrek dastatzeko. Okila taila taldekoek, ostera, euren lantxoak erakutsi dituzte, eta Hiruatx elkarteak bidezko merkataritzako produktuen postua jarri du urtero legez.
Herriko trikitilariek doinu alaiekin bete dituzte bazterrak eta ondoren bazkaltzera jo dute; Iturrigorri pilotalekuan elkartu dira eguzkitik babestu nahian. Bolotan jardun dute gero eta Larrain dantzak ere ez du hutsik egingo Euskeriaren Egunean. Ospakizunaren bukaera Ttek! elektrotxarangak girotuko du. "Giro polita sortu da eta oso gustura gaude", adierazi du Iñigo Iñurrategik, Loramendi Elkarteko presidenteak, eta gaineratu: "Disfrutatzeko eguna da, herritarrekin, umeekin, etorkinekin… Horregatik urterokoa izan arren ondo pasatzeko eguna da jai giroan".