goiena.eus

Beasainen jokatuko du gaur, eguaztena, Hirugarren Mailako taldeak

  Kirola  Aretxabaleta

31. jardunaldiari dagokion partida jokatuko du UDAko taldeak, gaur, martxoak 23, 20:00etan Loinaz futbol zelaian. Bestalde, UDAko kideak "haserre" daude joan den domekan epaileak aktan jasotakoekin, izan ere, hemendik aurrerako partiduak "baldintzatuko" dituela uste dute.

Beasainen jokatuko du gaur, eguaztena, Hirugarren Mailako taldeak
Espinosa, CD Vitoria taldearen aurka jokatzen, Ibarran. | Ikusi handiago | Argazki originala

Web atarian jarritako ohar bidez jakinarazi du UDAk Palet epaileak joan den domekan "hartutako erabakiek" eta "aktan jasotakoek" datozen partidak "baldintzatuko" dituztela. Hala diote: "Euskal Federazioak ez du UDAk aurkeztutako helegitea aintzat hartu eta Paleten gezurrak ontzat emanez, UDAko delegatuak eta hainbat jokalarik bidegabeko zigor gogorrak jaso dituzte eta ezingo dira berdegunean egon". Eta jakinarazi dute berriro aurkeztuko dutela helegitea "erabaki oker horren aurka".

Era berean, taldeak aurrez aurre duen egoerari aurre egiteko nahia agertu dute: "UDAk egoera zailagoak bizi izan ditu eta guztiok batera emango diogu buelta. Beraz, zalantzarik ez izan garaipenaren bila joango direla UDAko mutilak Beasainera. Eta lortuko dugu!"

Erantzunak

Erantzuna | #1

Denboraldia gogor doa gure talde nagusiarendako baina zaleok hamabostean behin Ibarrara joaten gara taldeari animuak ematera, bai egoera txarretan eta oparoenetan ere. Pasa den domekakoa lotsagarria izan zen: epaileek gure zelaia zapaltzen duten bakoitzean libre eta eskubide guztiarekin sentitzen dira nahi dutena egiteko; pertsonak dira eta akatsak egin ditzakete, ados, baina denak zentzu berean izateak behin eta berriz ausnarketa baten bidean jartzen nau: sailkapenaren zuloan gaude bai, egia da, eta hirugarren maila honetak "kategoria" gehiago (?) duten taldeak egon daitezke, baina inola ere ez ezin da onartu beltzez jantzitako pertsona batek talde bateko jokalarien kirol duintasuna zapaltzea, ez da bidezkoa.
Puntuak daude oraindik jokoan eta gure mutilek amaiera arte borrokatu dutela ez dut zalantzan jartzen. Gaur Beasainen lehen finala!!! AUPA UDA BETI!!!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa