"Etika kodea gura dugu, eta soldatari eta urte kopuruari muga jartzea lanpostu publiko batean", esan zuen Gomezek. Eta gaineratu zuen sustatuko dituztela enplegurako, etxebizitzarako eta kulturarako aukerak, "inolako diskriminaziorik gabe". Eta Irabaziren aldeko botoa eskatu zuen: "Batzeko garaia da. Aldatzeko ordua da eta posible da, hortaz, maiatzaren 24an bozka ezazu Irabazi; oinarrian daudenak mugituz gero dorreek dar-dar egiten dutelako".
Hipotekek kaltetutakoei laguntzeko plana ezertan ere ez
Deba-Urola barrutiko zerrendaburu Juan Luis Merinok, ostera, zergatik aurkeztu den Irabazi Batzar Nagusietara argitu zuen atzo Aretxabaletan: "Benetan garrantzitsuak diren bi gaiengatik: enplegua eta etxegabetzeak". Orain arte Aldundia gobernatu duen Bilduri zera esan zion: "Plana egin zuen Bilduk Gipuzkoako abokatuen elkargoarekin batera hipotekek kaltetutakoei juridikoki laguntzeko, eta hutsaren hurrengoa izan da plan hori. Izan ere, oraindik ez dakigu zer egin duten eta zein asmorekin".