Kopuru polita, antolatzaile Markel Uriarteren esanetan: "Teknikoki nahiko proba zaila da eta horregatik, ez genuen espero horrenbeste jendek parte hartuko zuenik". Aurten, gainera, zaildu egin dute ibilbidea. "Iaz jendeak bide-zidorrak bota zituen faltan eta hori horrela, aurten, ibilbideari goranzko bidexkak gehitzea erabaki dugu. Horrek teknikoki zaildu egin du zirkuitua eta fisikoki ere esfortzu gehiago eskatu die txirrindulariei. Dena den, oso pozik gaude lasterketak eman duenarekin". Gaineratu zuen Uriartek.
Lau ibilbide, lau martxa
Kategoriak bi ziren, ibilbideak, berriz, lau. Alegia, mendi bizikleta kategoriaren baitan, zirkuitu luzearen (34 kilometro) edo motzaren (25 kilometro) artean aukeratu behar zuten parte-hartzaileek. Berdin Enduron ere; luzeak 24 kilometro zituen, motzak, aldiz, 20. 202 parte hartzailetik 136k martxa normala egin zuten, 66k, berriz, enduro martxa. Zirkuituak toki askotan elkartu egiten baziren ere, Enduro, nola ez, askoz gogorragoa zen teknikoki. Aretxabaletako plazan hasi zuten ibilbidea. Handik, Mendiolara, gero Kurtzebarri azpitik Areatzara eta handik Urrexolara egin zuten. Urkuluko araztegitik, Aretxabaletako plazarako bidea hartu zuten parte hartzaileek. Lehenak, 12:00ak aldera iritsi ziren, azkenak, 14:30ak inguruan.
Debagoienetik eta kanpotik
Aretxabaletatik 30 lagunek hartu zuten parte; oñatiarrak, bergararrak, arrasatearrak edo eskoriatzarrak ez ziren falta izan. Kanpotik ere etorri ziren; Zarauztik, Donostiatik, Bilbotik edota Burgostik. Baita, Holandatik ere.
Espainiako txapeldunak tartean
Parte hartzaileen artean bazeuden martxatan ohikoak direnak eta lasterketatan lehen postuetan dihardutenak ere bai: esaterako, Iraitz Etxebarria mungiarra, 23 urtez azpiko 2011ko Espainiako txapelduna, edota Daniel Olarra, jaitsierako 2012ko Espainiako txapelduna, Gorlizkoa azken hori.