Distantzia txikiko alanbrerik gabeko sarea duen teknologia da bluetooth. Informazioa jasotzeko, bluetooth guneetatik gehienez 10 metrora pasatu behar da, mugikorraren bluetooth sistema piztuta eduki eta momentu horretan eskaintzen den informazioa jaso nahi dela adierazi. Teknologia proiektu horren bidez aretxabaletarrek bi astean behin “gif” animatu erako komunikazio aplikazioak jaso ditzakete telefonoan, eta urtean hirutan jaietako egitarauak deskargatu –Aratusteetakoa, Andramaixetakoa eta San Migeletakoa–.
Egokitutako hiru gune horiez gain, Arkupe kultur etxean ere badago beste bat, Arkupen bertan antolatzen diren ekitaldien berri ematen duena.
Samurra eta erosoa
Udalak iazko erabilera kopuruen berri eman du: 2.982 aldiz onartu zuten herritarrek euren poltsikoko telefonoetara bidalitako informazioa eta 67.830 poltsikoko telefono detektatu ziren bluetooth sistema piztuta zutela.
Inaxio Garro alkatearen esanetan, “hurbiltasunerako komunikazio estrategia" da teknologia hau erabiltzea, "poltsikoko telefonoa erabiliz, herritarrekiko harremana erraztu egiten da, erosoago bihurtu, eta gainera, ekonomikoa da eta guztiz ekologikoa”.
LMInteractiva Donostiako enpresak jarri du abian teknologia mugikorren proiektu hori gurean, eta beste aplikazio batzuk ere abian jartzekotan dira.