Antolatzaileek eurek adierazitakoaren arabera, Aretxabaletako trialsin zirkuitoa –Gipuzkoako txapelketarako puntuagarria–, berez, erraza da, beheko zatia teknikoa den arren. Baina, urtero euriak zaildu egiten du proba "Lokatza dagoeneko gure probaren bereizgarri bilakatu da", adierazi du umorez Javier Zunzunegik. Izan ere, zapatuan botatako euriak lokaztu egin zuen zirkuituko goiko aldea, gehienen gozamenerako.
Elitean Hondarribiako Jon Areitio izan zen onena, zazpi aldiz munduko txapeldun izan den Benito Rosek ez zuelako zirkuitua garaiz egin. Gazte mailan, berriz, Logroñoko Andoni Asenjo gailendu zen, infantiletan Sergio Fernandez eta emakumezkotan Itziar Murua aretxabaletarra.
Ikusle asko
Domekako giro onari esker asko izan ziren proba ikustera gerturatu zirenak. Horrekin batera, herriko gaztetxo askok probatu zuten trialsina, antolatzaileek jarritako bizikletei esker.