Asteleheneko jardunaldia nahi baino gehiago trabatu zitzaion Aretxabaletakoari: "Hirugarren zuloko bunkerrak kalte handia egin zidan, baina gaur zelaiaren par-etik golpe bat behera amaitu dut, eta zelaiko marka ontzea beti dago ondo", adierazi zuen atzo, txapelketa irabazi berri. Esandako moduan, Galdosek ez zuen Zuiako azken txapelketa puntuagarria ondo hasi. Trabatuta ibili zen lehenengo jardunaldian, baina bigarrenean egindako lanari esker hirugarren sailkatu da, bigarrenarekin puntuka berdinduta. Hala, azken jardunaldian egindako lan onari esker ziurtatu zuen Aretxabaletakoak Euskadiko sailkapen orokorrean lehenengo postua.
Gipuzkoakoa lehenengo, Euskadikoa gero
Gipuzkoako txapelketan lehenengo postua lortuta –ondoan duzue albistea– eman zuen Galdosek mahai gainean lehenengo kolpea, eta Arabako hitzordura lider iritsi ostean Aretxabaletakoak ez du kale egin: "Goiburun irabazi ostean gaur sailkapenean lehenengo postuari eutsi diot, horrek esan nahi du erregularrena izan naizela. Ez dago txarto".