Brues enpresak gaur itxiko du izenemate epea: 185 etxebizitzetarako, 459 lagun apuntatu dira. Hala ere, enpresakoek esan digute, horietako batzuk ez dituztela baldintzak beteko. Esaterako, Arrasaten erroldatuta dauden batzuk egin dute izenematea, eta derrigorrezkoa zen Aretxabaletan erroldatuta egotea. Orain, 459 lagunek aurkeztutako dokumentuak aztertu, eta baldintzak betetzen dituztenekin zerrenda bat egingo dute, eta zerrenda hori ondoren Udaletxean egongo da ikusgai. Atzo, eguaztena, bestalde, osoko bilkuran eguzkineko plan partziala onartu zuen, gune hori urbanizatzen hasteko lehenengo urratsa. Horren ostean etorriko dira, urbanizazio eta konpentsazio proiektuak. Atzoko osoko bilkuran izan ziren Lausitan bizi diren herritar batzuk, informaziorik ez dutela, eta alegazioak aurkezteko denbora gutxi dutela salatuz. Arduratuta agertu ziren bizilagun horiek, baina Udaleko ordezkariek esan zieten, Lausitako etxeko batzuk ordenaziotik kanpo daudela, eta gai hori, gainera, ez dela berria.