Euskal presoek bizi duten egoera jasangaitza salatzea eta aretxabaletarrak sentsibilizatzea du helburu EPEH Aretxabaletako plataformak. Hori horrela, hainbat eratako ekitaldiak antolatu zituen joan zen astean, eta gustura daude izandako erantzunarekin. Egubakoitzean, esaterako, Arrasateko Never Surrender taldeak kontzertua eman zuen eta gazte ugari hurreratu zen Ezkutu tabernara. Zapatuan, hilak 17, 40 bat lagun joan ziren Kurtzebarrira EPEH izara jartzera, eta ostean, 60 lagun inguru batu ziren bazkaltzeko.
Bost urteko ibilbidea
Aretxabaletako plataforma 1999ko apiril inguruan sortu zuten. Helburua zuen euskal presoen egoeraren berri emanez herritarrak sentsibilizatzea eta atxikimendua lortzea. Presoen egoera salatu eta lehenbailehen aldatzeko egin gura zuten lan. Herriko 33 taldek eman zioten babesa orduan, baita talde politikoek ere. Bost urte hauetan gorabeherak izan ditu plataformak, baina inoiz ez da isildu.