Eguraldiak laguntzea baino ez dugu eskatuko aretxabaletarrok Aratusteetarako, eta gainerako osagaiak geuk jarriko ditugu.
Aratuste-domeka
Mozorroei azken ukituak ematen dabiltza herriko koadrilak, eta Udaleko Kultura Sailak gertu dauka egitaraua. 10:00etan, txistulariek emango diote ongietorria egunari, eta 12:00etan, kalejira egingo dute koadrilek, txarangak lagunduta. 16 urtetik gorakoek, gainera, derrigorrez hartu beharko dute parte kalejiran, mozorro lehiaketan parte hartzeko. 12:30ean, Txino dantza egingo dute aurtengo Santa Ageda mutilek.
Arratsalde partean, 18:00etan, hain zuzen, kalejira egingo dute koadrilek eta herritarrek txarangarekin, eta 19:30ean, mozorro lehiaketako sariak banatuko dituzte udaletxean.
Aratuste-martitzena
Martitzenean, ostera, herriko ikastetxeetako ume eta gaztetxoak izango dira protagonista. 15:00etan, txarangarekin kalejira egingo dute, eta 17:30ean, buruhandiak irtengo dira. 18:00etan, Euskal Disko Festa egingo dute plazan. 20:30ean, herri afaria egingo dute Taberna Berri jatetxean; eta Aratusteak bukatzeko, Txinoaren hileta egingo dute, 22:30ean. Hiletara luto jantzita joan beharko dute herritarrek.