Aretxabaletan bizi diren edo ikasten dabiltzan ikasleei egiten diete dei Loramendi EEko kideek. Lan guztiak euskaraz egin beharko dituzte eta argitaratu bakoak izan beharko dute. Lan bakarra aurkez dezakete, gainera. Ezizenarekin sinatuta eman behar dituzte lanok Loramendi EEn, eta barruan, izen-abizenak dituen gutun-azala sartu beharko dute parte-hartzaileek. Abenduaren 18a bitartean aurkez ditzakete lanok.
Ipuina eta poesia
Lehen Hezkuntzako 2. eta 3. zikloetan dabiltzan ikasleek ipuin eta poesia lehiaketetan hartu ahal izango dute parte. Gai librea izango dute biek eta poesiak luzera ere bai; ipuinaren kasuan, orri batetik hiru orrira bitarteko luzera izan beharko du.
DBH-ko eta Batxilergoko ikasleak
Grabaketa lehiaketari dagokionez, DBHko ikasleei zuzendu diete. Lanbidearen inguruko kontuak, pasadizo zaharrak grabatu beharko dizkiete herriko edadetuei, eta 30 minutuko grabaketak izan beharko dute. Aurten, gainera, audio zintarekin batera grabaketaren gidoia eskatuko diete parte-hartzaileei antolatzaileek.
Komikien, amodiozko gutunen, e-mail bidezko hitzorduen eta piropo lehiaketetan DBHko ikasleek zein Batxilergokoek har dezakete dute parte. Komikiari dagokionez, 4 eta 12 biñeta artean aurkeztu beharko dira. Amodiozko gutunen kasuan, ostera, bi orriko luzera izan beharko dute gutunek, eta e-mail bidezko hitzorduak loramendi@topagunea.com helbidera bidali beharko dira.