Lizarralde bera eta beste hainbat elkartetako ordezkari Aramaion izan ziren joan den egubakoitz goizean, Ramon Ajuria alkatearekin, Martin Etxabe mendietako zinegotziarekin eta Aitor Larrañaga ABB-ko dinamizatzailearekin batera. Bisita hasteko, udaletxean bertan azaldu zitzaien labur-labur zertan datzan proiektuak.
Gero, hiltegi zaharreko beheko solairuan dagoen ekonomatoa ere bisitatu zuten, eta handik Mendiolako ikerkuntzarako eta berrikuntzarako zentrora joan ziren. Azkenik, Iturrieta sagardotegian bertako produktu ekologikoez osatutako luncha egin zuten.
Baserritarrak oinarri
Gipuzkoako ordezkariak harrituta geratu ziren Aramaioko herri dinamikarekin: "Ez zuten sinesten ABBren oinarria baserritarrak direla, eurak direla lan zailena antolatzen dutenak", zioen Aitor Larrañagak. Debate interesgarriak egiteko eta esperientziak trukatzeko aitzakia ederra izan zen bisita.