Santa Marina elizari eusteko lanak eta plaza eta ingurua urbanizatzeko lanak egiten dabil Excavaciones Arrasate enpresa Arexolan. Enpresako ordezkariak jakinarazi digunez, dagoeneko, okerrena bukatu dute: auzoko elizari eustea, hain zuzen ere. Elizaren kontra ormak jaso dituztela aditzera eman digu. Gaineratu digunez, datozen asteotan, plaza eta inguruak zolatzeko lanak egiten ibiliko dira. Besteak beste, galtzada-harriak ipini behar dituzte.
Horrekin batera, kontatu digu, zolatze-lanak egiteaz batera, Arexolako plaza handitzeko lanak ere egingo dituztela. Halaber, lanak bukatu ostean, plaza bi metro zabalagoa izango dela. Bukatzeko, jakinarazi digu lanok ez dutela eragozpenik sortuko autoen joan-etorrian.