Oletarrek abadea bizitzeko etxea eraiki zuten Olaetan 1747an, beste leku askotan moduan, ardoari ezarritako zergaren bitartez. Eta, 1923an, han bizi zen abadeak jabetza erregistroan sartu zuen abadetxea Gotzaindegiaren izenean, baina, ez zuen adierazi Gotzaindegia zela haren jabe, baizik eta haren edukitza zuela adierazi zuen. 1941era arte bizi izan zen abade hura Olaetako abadetxean.
Elkarten moduan
Rafael Untzaluk, abadetxearen gaia lantzen ibili denak adierazi digunez, urte askoan han ez da bizi izan abaderik; are gehiago, 1975etik aurrera, etxea konpontzeko asmoarekin elkartea sortu zuten bazkideen kuoten bitartez konponketak egiteko. Hala egin zuten. Harrezkero, abadetxea oletarrek erabili izan dute: elkarte moduan, auzoko emakumeendako Gainera, lehenagotik ere erabiltzen zuten abadetxe, egurra gordetzeko, korta moduan
Jabetza erregistroa
Kontua da, 1997an, oletarrek abadetxea jabetza-erregistroan sartu zutela, baina, eurak jabeak balira moduan. Horren ondorioz, Arabako Gotzaindegia dezente haserretu zen eta gutuna bidali zien oletarrei. Aldiz, haiek ez zioten kasurik egin.
Baina, geroago, abadetxearen teilatua konpontzen hasi zirenean, berriro ere Gotzaindegiaren gutuna jaso zuten. Rafael Untzaluren esanetan, mehatxuak-eta bidali zizkien, oletarren jarrera kritikatzen, eta gaia epaitegietara eramango zutela esanez.
Aldeko epaia
Hala egin zuen Gotzaindegiak, eta orain dela gutxi epaia kaleratu du epaitegiak. Oletarren aldekoa izan da erabaki hori. Horrek esan nahi du epaitegiak erabaki duela abadetxea oletarrena dela, eta ez Gotzaindegiarena. Rafael Untzaluk kontatu digun moduan, abadetxea Gotzaindegiaren jabetza lortzeko, 30 urtez jarraian bizi behar zuen abaderen batek, eta oletarrek epaitegiari probatu diote hori ez dela sekula hala izan.