Debagoienean atez ateko hondakin bilketa sistemaren esperientziak, Antzuolakoak, baditu ia zortzi hilabete, eta inguruko herrien arreta pizten jarraitzen du: Urretxuko Zero Zabor plataformakoak eta Oñatiko eta Arrasateko udaletako ordezkariak Antzuolako esperientzia ezagutzen izan dira gaur goizean.
Sistema berria ezarri aurretik jarraitu zituzten pausoak ezagutu eta izan dituzten arazoen berri jaso dute bertaratutakoek akats horiek hurrengo herrietan ekidin ahal izateko.
Oñatikoak aztertzen: zintzilikarioak jarri edo sistema hobetu
Mankomunitate berriak atez atekoa bultzatzen du eta Oñatiko Udalak sistema hori ezartzea argi duen arren, aztertzen dabiltza zintzilikarioen sistema erabili edo sistema hori hobetu.
Hurrengoa: Bergara edo Oñati
Arrasateko Ingurumen zinegotziak, bestalde, esan digu Bergara edo Oñati izango direla sistema ezartzen hurrengoak, baina horretarako gutxienez urte eta erdi itxaron beharko dugula. Izan ere, Epelen konpostaje gune bat egin beharko dute inguruko hondakinak bertara eramateko eta espero dute horrek urte eta erdi inguru iraungo duela eta hori egin artean ezin izango da inon ezarri hondakinak nora eraman ez delako egongo.
Diputaziotik Mankomunitateari jakinarazi diote 2.000 konpostagailu daudela Debagoienerako gertu eta 2-3 hilabeteko epean hemen izango ditugula.
Antzuolan bigarren fasearekin
Momentuz,Antzuolako Udalaren datuen arabera, hondakinen %92 birziklatzera iritsi dira. Lehenengo fasearen ostean, baina, bigarrenari ekingo diote datorren astean. Bigarren fase horretan, lantokiak eta enpresak hasi beharko dira atez ateko sistemarekin.