Independentzia eguneko menua: tortilla, babarrunak eta jai giro aparta

Herritar asko gerturatu zen lehiaketa ikustera eta tortilla zatitxoren bat dastatzera. Baina, sabelean tokia egin beharra zuten. Izan ere, babarrun jana zuten zain pilotalekuan.
Goizeko seietatik, 10 kilo babarrun prestatzen, Joxe Ramon Peñagarikano ikusi genuen. Peñagarikano eskarmentudun sukaldaria da eta badaki babarrun xamurrak egiteko trukurik onena poliki-poliki eta pazientziaz mimatu behar direla. "Babarrunak bere puntuan egon daitezen, goiz jaiki behar da eta poliki-poliki su apalean egon behar dira. Eta noski, laguntzeko nola ez txarri saiheskia, txorizoa, azalorea eta odolostea, bapo!".
Gazte Asanbladakoak gustura
Herritarren parte-hartzea helburu duen jaiak izandako harrera ikusita, antolatzaileak pozik.
"Antzuolar askok lagundu du eta parte hartu du. Pozik gaude jendearen erantzunarekin", azaldu digute Gazte Asanbladako kideek. Urte batzutan ospatu gabe izan den Independentzia eguna, berriro berreskuratu dute antzuolarrek. Hala, iaz berriro egin zuten jaiak izandako erantzuna ikusita, aurten  bigarrenez egin dute.
Gainera, laster antzuolarrek gaztetxe berria ere izango dute. Eraikinean zenbait lan egin beharko dira eta, horregatik, Gazte Asanbladakoek esku bat botatzeko prest dagoen oro animatu nahi dutela nabarmendu dute.