Debagoieneko Mankomunitateak zerbitzu berezia eskainiko du uztailaren 6an. Elgetaren kasuan deitu egin behar da aurrez eskaera egiteko: 943 50 47 21.
Uztailaren 6an, eguena, 19:00etan egingo da herriko hamar taberna-okindegietan Antzuolako produktuen II. Pintxo-poteoa. Ekimenaren helburua garaian garaiko eta bertako produktuek eskaintzen dituzten onurak herritarrei ezagutaraztea dela diote antolatzaileek.
Txan magoak Txinbili txanbala ikuskizuna eskainiko die neska-mutikoei Santa Ritako lorategian.
AED eta EHE elkarteek elkartasun keinua egingo dute gaur, eguena, asteburuan eguraldiagatik bertan behera geratu den EHZ jaialdia diruz laguntzeko. Horretarako, 21:30ean doako kontzertua joko dute Leire Etxezarreta eta Eider Garro bikoteak Jai Zale tabernan, eta norbanakoen ekarpenak eta barratik ateratako dirua Iparraldeko jaialdi musikalaren antolatzaileei emango diote.
Zapatu honetan, hilak 10, ireki eta irailaren 15era arte egongo dira zabalik Agorrosingo kanpoko igerilekuak. Honako hau izango da ordutegia: ekaineko, uztaileko eta iraileko astegunetan 07:00etatik 22:00etara, eta ekaineko, uztaileko eta iraileko asteburutan zein jaiegunetan eta abuztu osoan, berriz, 09:00etatik 21:00etara.
Euskara Batzordeak herritarrak gonbidatu ditu lehiaketan parte har dezaten. Nobedade nagusia da, 2018an udalerriaren sorreraren 750. urteurrena izanik, argazki zaharrak eta berriak parean jarrita edota irudi zahar eta berri banarekin muntaia eginaz, denboraren joana irudikatu gura dela. Parte hartzaileek argazki bikotea bidali beharko dute, irailaren 25a baino lehen.
Bergaran dira dagoeneko datozen bi asteetan Mizpirualdeko auzolandegian parte hartuko duten gazteak. Euskal Herritik eta Espainiako hainbat tokitatik etorritako hamabost gazte dira, eta egoitzako egoiliarrekin dinamizazio lana egitea izango da euren egitekoa. Bederatzigarren edizioa da aurtengoa.